كاريكاتير عاجبني قلت أحطه هنا

شريكة العمر

رابعة صيدلة

حلم قديم

أخيرا تحقق

زماااان كنت بأقعد أفكر ....... ياترى إمتى هيجي اليوم اللي هأذاكر فيه التوكسو والصيدلة الصناعية والأبليد

طبعا اللي مش في صيدلة مش عارف إيه ده ( دي أسماء بعض مواد البكالوريوس عندنا )وطبعا أنا بأقول كده مش حبا في المواد دي

أكيد لأه

أنا بأقول كده لأني هأكون قربت خلاص

قربت من إيه؟

قربت أتخرج

وهأبدأ أعيش حياة حرة مستقلة

طبعا ...موضوع الحياة المستقلة تحقق من أولى صيدلة ...لأني أصلا ماكنتش بأروح البيت أصلا

وأصبح الحلم الآن وأنا في آخر أشهر ليا في الجامعة البحث عن حياة حرة مستقرة

وبدأت أفكر .....ترى

كيف سأحقق هذه الحياة المستقرة

ومن أين أبدأ هل أبدأ بالعمل

أم أبدأ بالعجل ...في موضوع الجواز

الجواز ...يعني عروسه ...يعني شريكة العمر

ياترى هتبقى عاملة إزاي

إنسانه بجد ولا ......مش لازم

هتبقى زي مالواحد متخيل

ملكة جمال العالم .....في التعامل مع زوجها

أم عصبية ومنعكشه

روشه أم خشبه

أكيد محجبه غصبن عنها

ياترى لها في القراءة ولا سطحية

ليها في النت ولا آخرها التلفزيون

ليها في فن التعامل مع الآخر ولا ماليهاش

أديبه أو شاعرة أو صاحبة قصة أو رسامة أو معيدة في كلية ولا بتعرف تعمل محشي كويس

ليها في النقاش الجاد ....والبناء ولا ما بتعرفشي غير لغة الحلل

يارب ارزقنا زوجات صالحات ॥يارب

لحظات من الإسترخاء على شاطئ رأس البر قبل معركة الإتحاد كل عام

.....

.....

.....

لكن السنه دي مش زي أي سنه

لأن دي آخر سنه هشوف فيها الإتحاد _ إن شاء الله _ آخر سنه

هأشوف فيها وش مصطفى بتاع الرعاية وهوه جاي الصبح يقول أنا معرفشي حاجه عن أي حاجه

آخر سنه هشوف الضرب اللي بيحصل والخناقات اللي بتشتعل أمام باب الرعاية عشان تقديم الأوراق

يااااااااااااااااااااه

شريط ذكريات خمس سنين بحالهم

بآلامهم وآمالهم

تعلمت فيهم الكثير والكثير بل والكثير

تغيرت تماما

وأحمد الله على هذا التغير

أتذكر أول يوم دخلت فيه الكلية وأنا تايه .....مش فاهم الجدول ماشي إزاي

وها قلوبنا أنا أتذكر أول مسيرة طلعت فيها

وآدي أول مرة قلت فيها كلمة مسجد

وده ....وده.....

وده ........
حاجات كتيرة

اللهم اجعل هذه الاعمال في ميزان حسناتنا ولا تبخسنا منها شيئا لجهل مننا أو لرياء في أو لأي سبب

حكايتي مع الإمارات

دولة الإمارت العربية المتحدة

دولة عربيه صديقة 

وغنيه 

ودولة حديثة 

قضيت بها حوالي ست سنوات من عمري 

بإختصار : سنه أولى وتالته ورابعه إبتدائي 

وأولى وتانيه وتالته ثانوي

أولى إبتدائي

طبعا قمت الصبح زي الشاطر كده لأن نومي خفيف من صغري بفضل الله

وطبعا والدتي ربنا يديها الصحة حضرت لي الفطار عشان آكل واتبسط ( الواد رايح المدرسه ) وبعدين لبست الزي بتاع المدرسه وهو بإختصار

جلابيـــــــــــــــــــــــــــــــــــــــــــــــــــــــــــــــــــه بيضاء

طبعا أول يوم طبعا مش هأعرف أروح لوحدي

لازم حد يجي معايا

والدتي طبعا جات وصلتني

لغاية المدرسه

اللي كان إسمها مدرسة إبن زيدون الإبتدائيه

وأكيد طبعا كنت بسأل نفسي : يعني أيه

ابن زيتتتون ده

لغاية ما كبرت وعرفت إنها ابن زيدون مش زيتون

المهم: دخلت المدرسه مع والدتي

كلي براءه وطيبه و(( بلاهه)) ودخلنا لمدية المدرسة اللي رحبت بوالدتي جاامد

جدا

جدا

وطبعا دار بينهم حوار زي ما يكونوا كانوا عارفين بعض من خمسين سنه

وانا طبعا مش في دماغي وقاعد وديع وهادي على الكرسي وعمال أبص على صورة الراجل

اللي على الحيطه

واللي شفتها في خمسين حته قبل كده

برضه بعد كده عرفت إنها صورة الشيخ زايد رئيس الدولة

وفي نهاية الحوار النسائي بتاعهم

والدتي أخذتني لواحده في المدرسه

إسمها أ/ منى السكار

وقالت لي إن دي مدرسة الفصل اللي هتديك طول السنه

وطبعا دخلوا في حوار نسائي تاني

حوالي شويه شويتيين مش فاكر

المهم والدتي المفرض هتسيبني مع المدرسه وهتمشي

طبعا

وبكل

رجوله

قعدت أعيط

لأ ه انا عايز أروح

مش عايز أقعد هنا

مش عايز أقعد هنا

وطبعا أ/ منى مسكتني من إيدي وقعدت تطب طب عليا ( على فكره هي إماراتية الجنسية ) وأقعدت تهديني

وأخذتني معاها الفصل

اللي مفروض هاقعد فيه طول السنه

أولى اول

لا يمكن أنساه

الفصل حوالي خمستاشر طالب بس

ومكيف وهادئ مع إننا كنا عيال

وبدأ أول يوم من الدراسه

واللي فاكره كويس جدا

إن كان شكلي مميز في الفصل

لأني كنت قلبوظه

و أبيض

وهادي جدا

وقاعد في الاول

وشاطر

كفايه كده النهارده ونكمل إن شاء الله الأسبوع الجاي

حكايتي مع الإمارات

ذكريات

أحسن حاجة في المدونة إنها شخصية أكثر منها عامة

يعني الواحد بيكتب لنفسه أكثر من كونه بيكتب للناس

لذك فكرت أكتب بعض الذكريات والتي أشعر تجاهها بنوع من الحنين

او ممكن أكون أشعر تجاهها بنوع من الحزن

أو بنوع من الندم

ذكريات مترسبة في ذهني

ممكن يتعجب القريبين مني عندما يرون أنني مازلت أتذكر تلك التفاصيل الصغيرة

والمواقف البسيطة

ولكن إن كانت هذه المواقف لا تعني لهم شئ فهي تعني لي عمري الذي مضى

مش عايز أطول في المقدمة

أنا هأحاول كل مرة حاجة من اللي حصلت لي زمان

ولن أرتبها بترتيب تواريخ ولكن هأكتب بالبركة والله المستعان

نيمت البط

الموقف ده حصل وأنا عندي أربع سنيين

الصراحة أنا مش فاكره ولكن كل العائلة بتحكيلي عليه

وهو إني كنت واقف أمام البيت بلعب مع العيال الصغيرة _زمايلي _ وبعدين نينا _يعني جدتي يعني _ نادت لي وكانت اشترت بط وحطاه قدام البيت (البيت كان قدامه حاجة زي جنينه صغيرة)المهم

قالت لي واد ياعبد الرحمن

خد بالك من البط على ما أجيب حاجة من جوه وآجي

المهم دخلت جوه

وانا قعدت جنب البط الصغير

وكل شويه

البط يصوصو

فأفتكرته بيعيط

وكان معايا عصايه بلعب بيها

أقعدت أضربه واضربه

واضربه

لحد مامات

وبعدين نينا خرجت

بتقولي

أنت عملت إيه في البط يا عبد الرحمن

قلتلها كان بيعيط فسكته ونام

بتقولي أنا قعدت أضحك مع إني كنت زعلانه عالبط

ان شاء الله المرة الجاية هحكي قصة الإمارات معايا